Autor: Afaferrol

Outro ano máis, a Xunta de Galicia (Consellería de Cultura, Lingua e Xuventude) nos outorgou a subvención de Voluntariado Sénior.

Grazas a ela podemos implementar o noso programa “Acompáñame”. Este realízase na Residencia Mixta de Maiores de Caranza por persoas voluntarias maiores de 55 anos, quenes teñen a labor de apoiar e acompañar a residentes que, por razóns de idade, enfermidade, carencia, dificultade ou ausencia de apoio familiar ou social precisan de axuda para a realización de determinadas actividades imprescindibles na súa vida.

Queremos agradecer á Xunta de Galicia por seguir apoiando á nosa entidade e, máis concretamente, a este programa que, sen dúbida, contribúe ao benestar de quenes o realizan e facilita a vida cotiá de tantas persoas da residencia.

Moitísimas grazas!

Este mes dá comezo unha nova edición do noso programa Reinvéntate!

Este está dirixido a mulleres en situación de especial vulnerabilidade debido á súa falta de titulación ou baixa cualificación e ten o obxectivo de favorecer a súa inclusión social.

Nel traballamos de maneira integral, ofrecendo apoio e orientación tanto a nivel laboral, como persoal e familiar.

Este programa está financiado pola Xunta de Galicia (Consellería de Promoción do Emprego e Igualdade – Secretaría Xeral da Igualdade) e polo Programa FSE+ Galicia 2021-2027.

Se estades interesadas en formar parte desta nova edición, contactade con nós por calquera dos medios dispoñibles!

Onte estivemos en directo a través do noso Instagram @afa_ferrol. Esta vez afondamos un pouco máis sobre o ocio saudable nas persoas adolescentes, algo esencial para mellorar a súa calidade de vida.

Contextualizamos o concepto de ocio e falamos dos seus diferentes tipos: activo e pasivo. Pero, fundamentalmente, nos centramos na importancia que cobran o grupo de iguais e a familia á hora de promover o ocio saudable xa que, nesta etapa, son os axentes de socialización máis influentes.

Como xa sabedes, tedes á vosa disposición a grabación no Instagram!

En directos anteriores falamos de adicción a substancias, ás redes sociais e a internet, así como dos distintos riscos cos que os/as adolescentes se poden atopar na rede.

Onte conversamos sobre estilos de vida saudable e de como incorporalos á etapa da infancia e da adolescencia. O certo é que é moi importante que esto se faga durante este período, xa que os hábitos adquiridos neste último son difíciles de modificar na adultez.

Esta actividade, enmarcada dentro do noso Proxecto de Educación Familiar, foi posible grazas á subvención do IRPF da Xunta de Galicia.

Coma sempre, tedes a grabación no noso Instagram @afa_ferrol!

Este verán, ademais de reforzar as materias educativas, tamén estamos a traballar a coordinación, a axilidade mental, a resistencia e a concentración mediante diferentes xogos.

“Xogar é a forma favorita do noso cerebro para aprender” Diane Ackerman.

A pasada semana, continuando coa temática das redes sociais e internet, estivemos en directo para falar dos distintos riscos aos que se poden enfrontar os/as adolescentes mediante a utilización das distintas plataformas.

Profundizamos sobre a perigosidade asociada ao acceso a distintos contidos inapropiados. Tratamos asuntos como a violencia, os discursos de odio, os retos perigosos ou delitivos, o grooming/sexting, o contacto con persoas descoñecidas e a perda da privacidade, entre outros.

Coma sempre, esta actividade, enmarcada dentro no noso Proxecto de Educación Familiar, foi posible grazas á subvención do IRPF da Xunta de Galicia.

Lembrámosvos que podedes visualizar e escoitar a grabación no noso Instagram @afa_ferrol.

Onte estivemos en directo a través do noso Instagram (@afa_ferrol), por segunda vez, con Carla Saborido, educadora social.

O pasado 6 de xuño centrámonos nas adiccións a substancias, pero non podemos esquecer que tamén existen adiccións non químicas. Entre estas destacan o xogo patolóxico, as compras compulsivas ou o uso abusivo e descontrolado das redes sociais e internet.

Así pois, tendo en conta que vivimos nunha sociedade que cada día está máis informatizada, nesta ocasión abordamos o tema das adiccións ás redes sociais e outras plataformas de internet.

Falamos, dende unha perspectiva preventiva, de como evitar que os nosos/as fillos/as desenvolvan unha conduta adictiva. Para elo, sinalamos os distintos tipos de adicción a internet, enfatizamos a importancia de detectar os signos de risco, explicamos as causas e as consecuencias deste tipo de comportamentos desmedidos e destacamos a importancia de establecer normas educativas e outra serie de pautas que, como familiares, nos poden axudar a restrinxir o tempo de conexión.

Esta actividade, enmarcada dentro do noso Proxecto de Educación Familiar, foi posible grazas á subvención do IRPF da Xunta de Galicia.

Coma na anterior ocasión, convidámosvos a visualizar e a escoitar a grabación que está colgada no noso Instagram e a que fagades as preguntas e comentarios que consideredes!

Queremos lembrar que Reinvéntate, o noso programa dirixido a mulleres en situación de especial vulnerabilidade, continúa en pé ata o mes de agosto de 2024.

Nel traballamos de maneira integral, proporcionando apoio e orientación tanto no ámbito persoal, como familiar e laboral. 

As actuacións que se levan a cabo dentro de este programa están financiadas pola Xunta de Galicia (Consellería de Promoción do Emprego e Igualdade – Secretaría Xeral da Igualdade) e polo Programa FSE+ Galicia 2021-2027.

O pasado venres celebrouse o Día do Orgullo LGBTIQ+.

Os delitos de odio en contra das persoas pertencentes ao colectivo LGBTIQ+ continúan dándose arredor de todo o mundo.

A súa situación de vulnerabilidade increméntase cando se suman outros motivos (procedencia, orixe étnica, diversidade funcional, estatus socioeconómico, etc.) para exercer unha diferenza no trato cara elas, producíndose así unha dobre ou múltiple discriminación.

Dende AFA Ferrol, garantimos un espazo onde se valore, se respecte e se apoie o desenvolvemento de todo o mundo, independentemente da orientación sexual e da identidade de xénero.

É preciso seguir visibilizando as inxustizas que se cometen en contra de quenes non encaixan na cis-heteronormatividade!

Alcemos a voz pola defensa dos dereiros e da dignidade de todas as persoas!

Na tarde de onte, na Residencia Mixta de Maiores de Caranza tivo lugar a actuación da Coral Polifónica Eixil de Cedeira.

Queremos amosar os nosos agradecementos á Coral pola súa labor e o seu gran talento, e á Deputación da Coruña por facilitar, mediante a Rede Cultural, esta actuación.

Finalmente, grazas tamén á Residencia pola súa colaboración, así como tamén ás persoas traballadoras e voluntarias por asistir ao evento.